Tanja Orning og Alex Nowitz opererer i skjeringspunktet mellom det skolerte og sjølvlærte, det elektroniske og akustiske, det planlagde og det tilfeldige. Ei sursøt blanding som speiler tida vi lever i.
Alex Nowitz (solo) – wii, vokal og elektronikk
Tanja Orning (solo) - cello og elektronikk
Rikskonsertane ønskjer å setje fokus på samtidsmusikken ved å utfordre komponistar, utøvarar og publikum innan feltet. Ved å setje to utøvarar opp mot kvarandre som til saman utgjer eit kontrastfylt heile, trur vi på tydeleg og frisk formidling av nye musikalske uttrykk. Første par ut i serien er cellisten Tanja Orning og stemmekunstnaren Alex Nowitz. På programmet står forutan verk av utøvarane sjølve, eit flunkande nytt verk av Maja Ratkje skreddarsydd for Tanja Orning, verk av Klaus K. Hübler, Morten Feldman, og Simon Steen-Andersen.
-Som vokalist er eg interessert i å utvide moglegheitene til stemma. Live-elektronikken provoserer fram eit nytt kroppsspråk eller koreografi om du vil, seier ALEX NOWITZ. Nowitz er klassisk skolert tenor, plystrande virtuos og ein vokalkunstnar av den utforskande typen. Live bruker han forskjellige teknikkar som smatting, plystring, inhalerande vokallydar, utagerande roping, kontratenor og lav-tonesynging som han komponerer saman ved hjelp av to trådlause Wii-kontrollar og eit spesialbygd dataprogram som er utvikla på STEIM (Studio for Electro-Instrumental Music i Amsterdam). Han speler utan kablar eller statisk interface og kan røre seg fritt i rommet. Han skapar og kontrollerer musikken via rørslene sine. Framføringa er fysisk, overraskande og delikat. -Når eg samplar stemma mi under ein konsert, får eg kombinert materialet på nye vis, eg manipulerer, re-samplar og kombinerer bitane med nytt materiale. Resirkuleringa gjer at ein ny komposisjon veks fram. Heile kroppen, særleg armane og hendene, skapar, manipulerer og kontrollerer lyden og musikken. Eg som utøvar vert ein slags lyd-dansar. Dette møtet mellom menneske og maskin finn eg særs interessant, seier han.
TANJA ORNING er også oppteken av å krysse tradisjonelle skiljeliner - både som utøvar, komponist og improvisator. For tida er ho stipendiat ved Noregs musikkhøgskole der ho forskar på framføringspraksis i samtidsmusikken. -I samtidsmusikken eksisterer ikkje lange framførings- og tolkingstradisjonar, så utøvarar må bidra aktivt og personleg for at musikken skal nå ut, seier Orning. -Utøvaren må forske fram alle dei ulike klangane på instrumentet ved hjelp av ”brukarrettleiinga” til komponisten og det seier seg sjølv at utøvaren må ta mange kunstnarlege val. Eg likar denne fridomen, at komponistane tilbyr ei openheit i partituret og i materialet, der det er god plass for utøvaren å skape musikken i klingande form, seier ho. Under konserten speler blant anna Orning duo med seg sjølv på video og det oppstår uvanlege og overraskande situasjonar i samspelet mellom den ekte og den virtuelle cellisten. - Det er flott at Rikskonsertane satsar på samtidsmusikk! seier Orning. Eg gler meg til konsertane, eg synest det er eit fint og spenstig program, og det er spennande å spele dobbeltkonsert med den utrolig dyktige Alex Nowitz. Forvent det uventa!
Turnerute:
Oslo 23.2 Galleri Rom
Stavanger 24.2 Tou Scene
Bergen 5.10 Lydgalleriet
Kristiansand 12.10 Ny Musikk
Trondheim 13.10 Dokkhuset
For meir informasjon, kontakt:
cmh@rikskonsertene.no